X’inhi l-missjoni tal-OLAF
Il-baġit tal-Unjoni Ewropea jiffinanzja firxa wiesgħa ta' programmi u proġetti li jtejbu l-ħajja taċ-ċittadini fl-UE kollha u lil hinn minnha. L-użu ħażin tal-fondi mogħtija mill-baġit tal-UE jew l-evażjoni tat-taxxa, id-dazji u l-imposti, li jiffinanzjaw il-baġit tal-UE jolqtu ħażin b'mod dirett liċ-ċittadini Ewropej u jippreġudikaw il-proġett Ewropew kollu.
L-OLAF jaqdi l-missjoni tiegħu billi:
- jinvestiga l-frodi u l-korruzzjoni li jinvolvu fondi tal-UE b’mod indipendenti, biex jiżgura li l-flus tal-kontribwenti tal-UE jaslu lill-proġetti li jistgħu joħolqu l-impjiegi u t-tkabbir fl-Ewropa;
- jikkontribwixxi biex il-fiduċja taċ-ċittadini fl-Istituzzjonijiet tal-UE tissaħħaħ permezz tal-investigazzjoni ta’ mġiba ħażina serja mill-persunal tal-UE u mill-membri tal-Istituzzjonijiet tal-UE;
- jiżviluppa politika tal-UE soda kontra l-frodi.
X’jista’ jinvestiga l-OLAF
L-OLAF jista’ jinvestiga kwistjonijiet relatati ma’ frodi, korruzzjoni u reati oħrajn li jaffettwaw l-interessi finanzjarji tal-UE dwar:
- in-nefqa kollha tal-UE: il-kategoriji prinċipali ta’ nefqa huma l-Fondi Strutturali, il-fondi tal-politika agrikola u l-iżvilupp rurali, in-nefqa diretta u l-għajnuna esterna;
- xi oqsma ta’ dħul tal-UE, l-aktar id-dazji tad-dwana;
- is-suspetti ta’ mġiba ħażina serja mill-persunal tal-UE u minn membri tal-Istituzzjonijiet tal-UE.
Iċ-ċiklu tal-ħajja ta’ investigazzjoni tal-OLAF
L-OLAF jirċievi informazzjoni dwar każijiet ta' frodi jew irregolaritajiet possibbli, minn medda wiesgħa ta' sorsi. F'ħafna mill-każijiet, din l-informazzjoni hi r-riżultat tal-kontrolli magħmulin minn dawk li huma responsabbli mill-amministrazzjoni tal-fondi tal-UE fi ħdan l-Istituzzjonijiet Ewropej jew fl-Istati Membri.
Kull allegazzjoni li jirċievi l-OLAF tgħaddi minn valutazzjoni inizjali sabiex jiġi determinat jekk l-allegazzjoni taqax taħt il-mandat tal-Uffiċċju u jekk tilħaqx il-kriterji sabiex titnieda investigazzjoni.
L-investigazzjonijiet jistgħu jinvolvu intervisti u spezzjonijiet ta’ bini u huma kklassifikati taħt waħda mit-tliet kategoriji li ġejjin:
- Investigazzjonijiet interni: L-investigazzjonijiet interni huma investigazzjonijiet amministrattivi fi ħdan l-istituzzjonijiet u l-korpi tal-UE bl-għan li jinkixfu l-frodi, il-korruzzjoni u kwalunkwe attività illegali oħra li taffettwa l-interessi finanzjarji tal-Unjoni Ewropea; inklużi kwistjonijiet serji li għandhom x'jaqsmu mal-qadi ta' dmirijiet professjonali.
- Investigazzjonijiet esterni: L-investigazzjonijiet esterni huma investigazzjonijiet barra mill-istituzzjonijiet u l-korpi tal-UE bl-għan li jikxfu frodi jew kondotta irregolari oħra minn persuni fiżiċi jew ġuridiċi. Il-każijiet jiġu kklassifikati bħala investigazzjonijiet esterni meta l-OLAF jipprovdi l-biċċa l-kbira tal-kontribut investigattiv.
- Każijiet ta' koordinazzjoni: L-OLAF jikkontribwixxi għall-investigazzjonijiet imwettqa mill-awtoritajiet nazzjonali jew dipartimenti oħrajn tal-UE billi jiffaċilita l-ġbir u l-iskambju ta' informazzjoni u kuntatti.
Wara li tiġi konkluża investigazzjoni, l-OLAF jirrakkomanda azzjoni lill-istituzzjonijiet tal-UE u lill-awtoritajiet nazzjonali kkonċernati: dan normalment jinkludi t-tnedija ta’ investigazzjonijiet kriminali, irkupri finanzjarji jew miżuri dixxiplinari u amministrattivi oħrajn. Imbagħad dan jimmonitorja wkoll kif dawn ir-rakkomandazzjonijiet huma implimentati.
Linji gwida dwar il-Proċeduri ta’ Investigazzjoni għall-Persunal tal-OLAF
Pjan ta' ġestjoni 2023
Pjan strateġiku 2020-2024
Rapport annwali tal-attività 2021